KEP LA DWE ALE, DOKTÈ ARISTID DWE TOUNEN LAKAY LI

Pòtoprens, 14 /12/2009

Konferans Pou Laprès

RONMFL ap salye laprès pou tout sipò l nan lit lap mennen nan peyi ya, konsa RONMFL te lanse yon petisyon jou ki te jedi 10 desanm 2009 la pou di non a KEP desklizyon PREVAL/DORSAINVIL la ki mete majorite nasyonal la deyò nan eleksyon yo e mande l rache manyòk li, bay lokal dèlma a blanch.
Nan sans sa a RONMFL pwofite pou l raple opinyon nasyonal kou entènasyonal n ap kontinye ak siyati yo pou voye KEP ya ale. Nou tou pwofite envite laprès ak tout popilasyon an, jou kap madi 15 desanm 2009 la apati 10 zè nan maten pou 2 zè sou channmas la, plas dèmati an fas palè nasyonal pou vin kontinye siyen petisyon an kont KEP/PREVAL/DORSAINVIL la.

Nou menm nan RONMFL nou apiye ak tout fòs nou, gwo manifestasyon komite ezkzekitif FANMI LAVALAS ap òganize jou k ap mèkredi 16 desanm lan, pou mande KEP ya rache manyòk li bay tè ya blanch e nou mande tout popilasyon an, nan tout katye popilè yo, Bèlè, Site Solèy, Granravin, Solino, kafou, Delma, PetyonVil, Taba elatriye, pote kole pou mande retou fizik Prezidan Jean Bertrand Aristide .

Pandan pwosesis petisyon an ap kontinye pou mande KEP koupyon an rache manyòk li, nap tou voye yon pinga bay pouvwa Preval/Bellerive, pou di l pèp la pap aksepte okenn eleksyon malatchong pike kole kap pote plis mizè ak grangou pou popilasyon an .

Nou konnen pifò pouvwa an ayiti sitou pouvwa diktati yo pa vle tande verite
y ap touye w ou byen kidnape w, epi ekzile w. Se nan sans sa a pifò moun k ap revandike pou mas pèp la, sou rejim Preval premyè ak dezyèm vèsyon jwenn lanmò yo, kouwè :Père Jean Mary Vincent, Père Ti Jean Pierre Louis, Antoine Izmery, Georges Izmery, Jean Dominique, Père Gerard Jean Juste, Jean Lamy, Lovinsky Pierre Antoine, Docteur Jean Bertrand Aristide.Pou n site sa yo sèlman.

Viv lit pèp la, kèlkeswa sak rive ya nou pa gen dwa kanpe nan wout fòk nou soti anba prizon Preval la.



"Yon sèl nou fèb, ansanm nou fò, ansanm, ansanm nou se Lavalas".

P.O.BOX 2252 Fort Pierce, Florida 34954
info@fanmilavalas.net
www.fanmilavalas.net
954-670-9209