BÒN ANE LAFANMI (18 MAS 2011)

Yon bèl flè souri

Blayi sou figi zandolit

Ki griyen dan l

Mezi lajè machwè l

K ap gade an chat pent

Kòd bandjo pipirit twoubadou

K ap bouske akò lakontantman

Pou konpoze yon ochan tou nèf

Pou yon lane tou nèf

Ki t ap kouve ze mobilizasyon

Ki kale 18 mas

Yon bèl kòk kalite RETOU

Lafanmi t ap kouve

An n ride yo chante

Bòn ane Lafanmi

Sou pòpyè douvanjou

Souf lanmè fin neye

Nan lanvè lanjelis

Nanm solèy kankannen

Nan mitan laye lalin

K ap fè jouda nan fenèt lesyèl

Yon lane tou nèf fèk kale

Nan fontenn 18 mas 2011

Ann ride lalin klere

Tout lannwit ane sa a

Pou di bòn fèt Lafanmi

18 mas 2011

Yon lane kouray

Pou mare tèt koumansman

Pou tout kolibri koulè lapè

Al rache zepon ipokrizi

Ki fè pepinyè pil sou pil 

Nan kwen kolèt mouche kayiman

Ki koupe zèl devlopman

Rache dan devan chanjman

Ak pikwa destabilizasyon

Men jèm mobilizasyon donnen

Pou akouche yon lane 18 mas

Bon lane kòd fanmi

Bon lane patizan lavi

Awousa tout plimay

Simen zatrap koudEta

Nan kafou si m te konnen

Sot nan koridò pa tann te

Akouche 7 lane lekzil

Ponn 7 lane lanfè

Nan nich chèf baskou a

Men rasin revandikasyon

Kòd fanmi zwazo te plante

Kreve kòt bato mechanste

Ki donnen nan salon Wachintonn

Jis li fè retou a fè grenn

Ki vin mi 18 mas

Sou chimen pèp Lavalas

Bòn ane pitit lamas

Bòn ane Kòd Fanmi

 Bon ranmye vwayajè

Pote flè remèsiman

Nan laye larekonesans

Jis nan lizyè ziltik

Jis sou fontenn Lafrik

Kònen lanbi pwezi

Kite l koule akò kontantman

Pou di frè n sè n Lafrik

Yon Lavalas remèsiman

Kite l koule nèt ale

Tankou gout san militan

Nen pwent fizi asayan GNB

Pou di Lafrik vin fete ake n

Yon lane tou nèf

Ki fèk koumanse

18 mas ki sot pase

Bon lane Lafanmi

Laboratwa an chat pent

Nan fant dan agranman

Makonnen a vinèg mechanste

Konpoze pou ti peyi

Pwazon vyolan destabilizasyon

Ki kale rat do kale mera koudEta

Simaye nan chak kalfou

Men sewòm mobilizasyon

Kase may chenn lekzil

Pou dechennen rasin retou

Ki anchenn zèl lidè lakou a

Bòn ane patizan Lavi

Bòn ane kòd Lafanmi

Asid mobilizasyon djanm

Fonn baryè lanfè kanpe lwen

Pou pitit pwòp tè ginen

Chak grenn chaplè konviksyon

Nan litani mobilizasyon

Tankou flèch wozo pliye pa kase

Se yon mach pou monte

Jis dèyè tèt mòn nan Gonmye

Jis nan fontenn rezilta lit la

Pou kraze miray mechanste

Ki bare zegwi limyè retou a

Pou n pa di Bòn ane Lafanmi

Nan zepon kòk lakou

Vitamin angrè lanmou

Kwape zèb lamechanste

Ki fè laviwonn lantouray

Anndan sèvo reken ak kayiman

Malfini ki vole an maskay

Pou simen pwazon rayisman

Pou bloke machin fratènite

Ki fware rèv egalite

Ki mare de pye manzè lalibète

Fè katastwòf koudEta

Ak tè tranble destabilizasyon

Ki bay tsounami lekzil

Men pwa grate mibilizasyon

Konn bloke motè kou RETA

Pou fè limyè yon lane tou nèf

Klere sou chimen chanjman an

Bòn ane Militan konsekan

Bòn ane tout kòd Fanmi an

18 mas lane sa a

Yon lane nèf kou nèf pwent

Fèk kare koumanse

Lane pou n ta deside

Denonse ribanbèl san

K ap degringole koule

Sou lotèl peyi Libi

Pou makòn reken kayiman

Galgari sou de dan devan

Pou n ka di frè n sè n Libi

Bòn ane bon kouray nan batay

Twa wòch dife makònen

Wòch dife konsyantizasyon

Wòch dife mobilizasyon

Wòch dife detèminasyon

Ak flanm dife manifestasyon

Bouyi chodyè retou

Jèm lavi nan Twou Koukou

Zandolit rete sezi

Devan makòn rasis

Kimare nan pakèt ipokrizi

Potanta peyi zanmi ipokrit

Flonn lanmò twò piti

Pou tenyen jèm lavi

Zèb lanmò pa sifi

Pou kokobe ti flè lavi

18 mas 2011 ane sa a

Yon lane tou nèf fèk tanmem

Pou tout patizan jèm lavi

Pou patizan jèm lanmou

Bòn ane patizan Lavi

Bòn ane patizan pwogrè

Bòn ane patizan chanjman

Bòn ane kòd Lafanmi

J. Fatal Piard

"Yon sèl nou fèb, ansanm nou fò, ansanm, ansanm nou se Lavalas"
CFLHO
P.O.BOX 2252
Fort Pierce, Florida 34954
www.fanmilavalas.net
info@fanmilavalas.net
312-735-6297